Jahresbericht 2006


Eierleset
(22./23. April 2006)

Am Fritig Obe het s'Eierleset weder met em traditionelle Eiertätsch gstartet. Das heisst, de TV esch jo scho set afangs Johr fliessig am nähie gsi ond mer send nochli go hälfe Blüemli mache, well sie halt eifach scho betzli schöner usgsehnd, wie die originelle Blueme vom TV.
Doch am Fritig eschs grad recht hektisch worde, wo mer erfahre händ, dass d'Glogge vor em Huus en Konkurrenzstand met Hot-Dog ond Hamburger näbe euse Grillstand wänd stelle! Mer händ denn no meh oder weniger heftig diskutiert ond send im Räbi nochli länger höckle blebe.
Am Samschtig send denn de Joni ond d'Yvonne met de Glogge Wertin go rede ond nochdem sie eus ehres Leid het chönne klage, hämmer sie chönne öberzüge, dass das met dem Stand ned so en gueti Idee esch! Sie hets zom Glöck de glo! Sosch eschs Ufstelle tip top gloffe, mer send glie fertig gsi. Ganz grosse Dank au dene vom TV, wo ned in Wald send, sondern eus send go hälfe ufstelle i de Halle. Die zwe irische Bands send super gsi. Leider hets ned eso vell Lüt gha, aber en Huffe Heiweh-Effiger händ de Weg a dem Wocheänd zo eus gfonde.
Au de Sonntig esch riibigslos gloffe. Es het sogar schön Wetter geh ond vell Lüt send cho luege. Au dobe i de Halle het mer gmerkt, wie guet alli zäme schaffe ond so hets ohni Problem klappet. Wie all Johr semmer noch em Ufrume no i de Bar glandet ond händ da Fescht lo usklenge.
För die, wo nonig gnueg Eier gha händ, hets denn im Bahnhöfli am Mentig no de Schlosseiertätsch geh, wo aber gläb nömm allne vom TV so guet do het...


Auffahrtswanderung
( 25. Mai 2006)

Well mer jo z'Effige kei rechtigi Beiz meh händ, het eus de Swen a Uffahrt am Morge zo sech Hei iglade, zo Kaffi, Brötli oder au Bier, wer het welle. S'Wetter esch weder mol ned so prächtig gsi, aber met Scherm ond Jagge usgröschtet send mer denn imene chliene Gröppli doch losgwanderet Rechtig Bözberg ond händ onterwägs no de Stregel us em Näst gholt. Of em Bözberg esch alles scho top organisiert gsi, en Grill esch parat gstande, Bier för de TV ond en Martini för eus. Mer send aber ned soo lang gsesse, wells doch cheibe chalt gsi esch. Wiiter eschs gange in Sterne of Elfige, wo de Stregel ond de David scho chli händ müesse schlofe am Tesch ah ond eus het en alte Tornveteran ond Obertorner vo Effige Gschechte vo früehner verzellt.
Denn hämmer s'letschte Stöck in Bäre of Böze in Agreff gno. Ganz im Frede hämmer det no chönne z'Nacht neh. Nochher send de d'Bözer ond de Hude no cho ond sesch zemli lut ond ahstrengend worde. Was mer alles cha mache met Röhre, Ketchup, leere Gläser, das verzelle mer do lieber ned. Of all Fäll send früehner oder spöter am Schloss alli heil weder z'Effige acho!


Vereinscup in Mülligen
(02. Juni 2006)

Am Fritig ischs in Müllige wieder so wiit gsi. Mir händ eusi Schuelstufebarreüebig vor Wertigsrichter und Publikum vorgfühert. Trotzdem, dass mir die Üebig fascht bis zur Vergasig probt händ isch's halt immer öpis anders vor Zueschauer. I de Rangliste simmer uf em 18. Platz vo 20 glandet. Do hämmer gwüsst was es gschlage het und händ grad am Mittwoch druf a de Üebig afo fiele.


Kreisturnfest Brugg
(30. Juni - 02. Juli 2006)

Am Fritig sind scho die erste für's Einzel gstartet und händ d'Alage in Augeschiin gno. D'Nicole, Manuela und d'Mirjam händ ihres Beste in verschiedene LA-Diszipline gä.
Am Samstig simmer mit Posti oder Auto uf Brugg gfahre. Euse Wettkampf het erscht am halbi 5 agfange! Die 1. Disziplin isch Schuelstufebarre i de Turnhalle gsi. Euses fiele a de Üebig het sich glohnt. Mir sind mit ere Note vo 8.82 besser gsi als am Vereinscup! Voller Elan ischs wiiter zum Hochsprung gange. Det hets leider ned so klappt wie gwünscht. D'Nervosität het de einte oder andere en Strich durch d'Rechnig gmacht. Bem 3. Teil isch die eint Gruppe ga Schluchbootfahre und die andere händ ihri Inlineskates gschnallt. Im letschte Momänt hämmer de au no en Ersatzskater gfunde. D'Angi het extra no in aller Eile en Usrüstig postet, wo sie de glich ned het chönne ifahre. Aber Danke viel mal für de Super Isatz!!! Bem Inline hämmer sogar eusi best Note usegfahre und das Dank de Nicole ihrem Megaspeed!
De Abe hämmer gmüetlich unter de Bäum gnosse, aber es richtigs Fest isch ned recht ufcho.
Am Sonntig ischs mit de Jugend wiitergange ond d'Kampfrichter händ scho früeh uf em Platz müesse stah. Am Nomittag het mer bi bestem Wetter die allgemeine Vorfüehrige dörfe bestune. De Abschluss isch wie immer de Fahnesturm und d'Besammlig bim Fahne gsi.
Mir händ s'Turnfest z'Effige im Bahnhöfli mit em Rangverläse la usklinge. I de 3. Stärkeklass sind mer vo 13 Vereine 2. worde! Grad no 1 Platz vor em TV!


Turnfahrt nach Kerenzerberg
(20. August 2006)

Das Johr send mer nor ein Tag of d'Tornfahrt, well jo chorz drofabe grad s'Dorffescht cho esch. So hämmer ghofft, es chöme vellech chli me Lüt met, aber mer send denn halt glich nome 7 gsi.
Mer händ beschlosse met em Auto z'gha ond so hämmer gmüetli chönne uspfuse ond eus am 9i fang bim Volg besammle.
Bi Sonne send mer im Frecktal gstartet ond au bim Zmorgekaffi z'Kerenzerberg het s'Wetter no sehr guet usgseh. Aber wie chönnts au anders si. Chum send mer losgwanderet, esch es cho rägne. Alli Sonnelieder, wo mer gsonge händ, händ nüt gnötzt ond es het no me agfange rägne. Wies eusi Wetterfee d'Iris scho vorus gseit het. Mer händ eus ned lo erschrecke, händ de Litchi vo de Lola halt onderem Regescherm tronke ond send schnell uegwanderet. Nass send mer i de Beiz acho, zom Glöck hets es warms Öfeli gha. Bim wiiterwandere het sech sogar no d'Sonne zeigt ond met emene grosse Schnetzel im Buch send mer of's Trottinett gstege. Usgröschtet met reese Rägeschötz, wo mer dezue öbercho händ. Die wäre aber gar ned nötig gsi, well s'Wetter esch emmer besser worde. D'Ussecht esch wonderschön gsi ond mer händs abefahre so rechtig chönne gnüsse! Noch em sönnele onde a de Station send mer weder Hei gfahre. D'Stemmig im Auto esch super gsi, i säg nor Elvis lebt...
Am Pöschtlifescht z'Böze händ mer denn Tornfahrt lo usklenge. Es esch en ganz loschtige Tag gsi, ganz noch em Motto: Es get kei schlächt Wetter, nor schlächti Chleider!Herzleche Dank för's organisiere, vellech semmer nächst Johr jo weder meh Lüüt??


Dorffest
(01. - 03. September 2006)

Vom 01. - 03. September 2006 hed in Effige s'Dorffäscht stattgfonde. Am Zischtig vorhär hed s'grosse Vorbereite agfange. Bi strömendem Räge esch s'Zäut ufgschtöut worde, aber scho am Fritig, wo s'Dorffäscht losgange esch, esch es denn schön gsi.
D'Isätz hei wie am Schnüerli klappet ou die Schechte am Morge früeh… ond ou die, wo dore Tag bi ehrne Schechte fasch verhetzt si, heis guet öberläbt. Es hei sech jo aui of e Obe gfröit, vöu hei denn ou zemli lang gfäschtet.
Am Sonntig Obe, wo s'Ändi cho esch, hei mer denn no die letschte uftoute Pizza's verschänkt. Da hei mer öis jo ou chöne leischte noch däm super Wocheänd ond d'Lüt hei wörkli fröid gha. Die meischte hei öisi Pizza's ächt super gfonde ond heis aube scho fasch gloubt, weme gseit het, si sige totau säuber gmacht.
Ab ond zue hets haut eini geh, wo enne nochli gfrore gsi esch, aber wär Honger hed, esst ou das…
Der weniger schöni Teil esch denn no am Mentig bim Ufrume gsi, aber ou dä Tag esch vorbi gange.
Of jede Fau hani nome Komplimänt ghört för öises Dorffäscht ond för öises Beizli sowieso.


Kreisspieltag Hottwil in Brugg
(17. September 2006)

Am Sonntigmorge in aller Frühe sind mer uf Brugg gfahre. S'Wetter het sich ned grad vo de beste Site zeigt, aber wenigstens hets ned grägnet, NONIG! Wies ame so isch sind mir noni ganz wach gsi aber s'1. Spiel hämmer trotzdem be beidne Gruppe souverän über d'Rundi bracht. Bim 2. Spiel hets zerscht liecht afo tröpfle, vo dem hämmer eus ned la beidrucke. Wos denn aber fast Bindfäde gregnet het isch de ganz Kreisspieltag abblase worde. Im Festzelt simmer pflotschnass nochli zämeghöcklet ond händ es verspötets Zmorge gno. No vor de 11 Uhr simmer wieder dehei gsi.


Suserbummel
(11. Oktober 2006)

Am Mettwoch, 11. Oktober 2006 hei mer öis för e alljöhrlech Suserbommel am halbi 8i bim Volg troffe. Dass of der Iladig es falsches Datom gstande esch hed gloubs ned emou öber gmerkt.
Bi trochnem Wätter simmer denn zom Büchli ufe gloufe. Wobi der einte oder andere denn no d'Idee cho hesch, me hätt jo chöne s'Velo metneh för d'Heifahrt...
Schliesslech dobe acho hets natürlech vell Suser geh ond Fleischplättli, wo mer niemaus aus hei möge.
Nocheme gmüetleche Obe si denn die erschte scho weder langsam heizue gange.


Chränze
(29. November 2006)

Ändi Novämber hämmer eus, wie jedes Johr, ide Militäronderkonft in Effige zom gmeinsame Chränze troffe.
So nach de Achte send denn doch au alli idrudelt gsi ond mer händ afo chrampfe. Es paar fliessigi Ängel händ scho vorgschaffet gha ond en Chranz oder es Gsteck vo deheime metbrocht. Leider semmer das Johr ned esonen grossi Truppe vo Freiwillige gsi ond händ somit echli meh müesse ad Säck. D`Regi het no sonen gueti Seel metbrocht, wo eus derbi onderstötzt het.
Jede het echli verschiednigs Dekomaterial metbrocht, meh het chönne uslese zwösche kitschig-farbig, natur und öeko-Sache. Somit send natürli ganz interssanti Werk ond Kunststück entstande, wie zom Bispiel de Petra ehre neongrüeni Baum - eifach mega!!!
Zwöschedore het meh au weder en Schwatz ghalte oder es paar Chrömli gnosse. Es esch en chorzwiilige, gmüetleche ond kreative Obe gsi.
Am Samschtig hets so flotti Freiwilligi gäh, wo die Chränz ad Effigerbevölkerig brocht händ. Ich has ghöre säge, dass das Johr de Verchauf chli chnorziger vora gange esch, aber schlossäntli het jede Chranz sin Platz gfonde.

Danke för die tolli Zämearbet ond euri Mithilf.


Chlaushock
(20. Dezember 2006)

Am 20. Dezämber 2006 hämmer eus alli warm ipackt bim Volg z`Effige met Händsche ond Chappe versammlet.
Leider esch nor en chlini Troppe zäme cho ond so hämmer en loschtige Marsch in Richtig Böze bi ganz klarem Stärnehimmel ondernoh. Aber scho gli hämmer bim Marschiere gmerkt, dass mer alli echli zwarm agleit send ond eigentli no gar kei Ussicht uf Wenter esch. Im Januar fast schwitze esch au no komisch.
Ide Post z'Böze hämmer denn euses Ziel erreicht gha ond en warmi Minestrone-Suppe ond früsche Speckzopf het uf eus gwartet. D`Sandra Riner het eus de Tisch mit Manderinli, Schöggeli ond alles was derzue ghört gschmöckt gha ond eus derbi öberrascht.
Chum abghocket, hämmer natürli bim schnäddere scho afo knabbere. S`Astosse het natürli au ned dörfe fehle, aber för alles esch gsorgt gsi ond somit het en feine Glüehwii oder en warme Punch euse Mage gwärmt.
So hämmer im Pöschtlikeller en gmüetliche Obe dörfe verbrenge ond metenand schwätze ond lache.